الاثنين، 31 مايو، 2010

التاج السلطاني

أولاً احب اشكر حبيبتي جندولة إلي أعادتني إلى دائرة التواصل التدويني من خلال هذا الهوم وورك ، صج ما كنت مستوعبه إني أتمتع بشبكة إجتماعية من نوع آخر و إن في ناس على الرغم من إنا مفصولين عن بعض بالكثير من السرادقات و الستائر لكن لا يمكن إني أنكر بيني و بينهم "علاقة" متكاملة حتى و إن كنا ما نشوف بعض ولا نعرف بعض بأسامينا الحقيقة.

ألحين نيي على قوانين التاج السلطاني :)

قوانين التاج السلطاني:
-اذكر اسم من طلب منك حل هذا الواجب
-تحدث عن ستة أسرار قد لا يكتشفها من يقابلك للمرة الأولى
-حول هذا الواجب إلى ستة مدونين، واذكر أسماءهم مع روابط مدوناتهم في موضوعك
-اترك تعليقا في مدونة من حولت الواجب إليهم، ليعلموا عن هذا الواجب


************************************************
حل الهوم وورك الاول : جندل صاحبة المدونة العامرة شربت آند كو هي إلي قطت علي هالواجب

الواجب الصجي : الأشياء إلي محد يعرفها عني ..إمممممممم مادري ...ماني عارفة ألحين شلون بفرق بين الأشياء إلي ما يعرفونها المدونين عني و بين الأشياء إلي ما يعرفونها الناس عني في الحياة العادية بس عموماً ممكن أقول:


- إني عسماوية و خطي وايد حلو :)
- إني وايد وايد وايد أحب العروس ، ما عندي مانع كل يوم أنعزم على عرس وما أنزعج من الاشياء إلي تزعج غيري لما يكونون معزومين على عرس ، أحس بالسعادة من اللحظة إلي أحجز فيها موعد بالصالون لين اللحظة إلي أترك فيها الحفلة و أحب أقعد اليوم إلي وراه أسولف عن العرس :)
- التحلطم ساعات يكون حلو بس إذا دخلت مقعد و السوالف الدايرة كلها تحلطم بتحلطم أحس تييني رقعة بقلبي
- في شي الناس وايد ينزعجون منه بس آنا وايد اسويه ....I love giving hugs & recieving them in return
و ما عندي مانع لما أشوف أي وحدة متضايقة أركض لها و ألمها ، على إني إنسانة شوي رسمية و أحب أحط حدود بس "اللمة"بالنسبة لي هي أحد الطرق للإسعافات الأولية سريعة المفعول، تقدرون تقولون إن حضني "سبيل" ...إحم (للنساء و المحارم فقط)
-مو شي غريب لما أقول إني وايد وايد وايد أحب اليهال ، بس الشي إلي الناس يتعجبون منه إن اليهال يحبوني و ينجذبون لي (الله يتمم علي وايد أحب هالشي) ، آنا بصراحة أتفاجأ لما أشوف اليهال يتلزقون فيني خاصة إن شخصيتي وايد هادية و مو من النوع إلي أحب اللعب و المناقز.
- و أخيراً وليس آخراً ....إني أعرف أيبب :)

بالنسبة للواجب إلي وراه ...أحول هذا الهوم وورك حق سويت ريفينج

الواجب الأخير : إن شاء الله :)

دمتم بود

هناك 24 تعليقًا:

esTeKaNa يقول...

يا صباح الشوق كله
:)
تدرين؟
أنا ودي اطلع من الشاشه وألمج من فرحتي بوجود بوست يديد وبوجودج حولنا
فقدناج حيل من غير شر
ولما اكتشفت انج تؤمنين باللمة قلت اشوة عشان ما تقول استكانة استخفت
:)))

(1)
اخوي عسماوي
امي كانت تربط ايده على الاكل عشان يحاول ياكل باليمين
انتي اشلونج مع الاكل يمين ولا يسار؟
:)
(2)
على طاري العروس:
هناك من تلتقين معهم نفسيا قبل لقاءهم فعليا،انتي ،جندل النور وبنت الشامية ...لي آخر لحظة وأنا افكر اشلون اشوفكم بعرسي
بس ما قدرت استوعب فكرة اول لقاء لنا يكون بعرسي
حسافه:(
(3)
اشاركج برقعه القلب
في مقاعد تقومين ثقيله
(4)
نادر الاشخاص اللي يسونها
بس هذا دليل انتي انسانه حنونه
(5)
ما شاء الله ،للحين اذكر صور بنت عمج بالمطبخ الله يحفظها
:)
(6)
تعطين دورات تيبب؟
:P

chandal/danchal!! يقول...

loooooooooooooool

هالتاج طلع المستخبي والمستنيّل

ماحب العروس وطفارتي اشم وألم بالناس... وايد ناشفة حتى مع عيالي حدهم معاي لي اول سنتين وبعدين ما عندي غير العين الحمرة

:)

اسرارك عجيبة وغريبة ولا اليبباب لووووووووووووووول

سعيدة بعودتك للتدوين وسعيدة اكثر بمعرفتك

:)

الزين يقول...

شوفي

انا عندي اللمه تشفي كل داء
ومن اشوف احد متضايق المه

يعني طلعنا نتشابه بهالنقطه
:)

ومن طول الغيبات يا ميلو
زين سوت جندل طلعتج من صومعتج

:*

chandal/danchal!! يقول...

استكانة

توني اقرا تعليقك

:))

معرفتك معرفة السعد وتأكدي ان المعزة متبادلة وأكثر ... شكثر فرحت لك ودعيتلك بالتوفيق هذا غير ربعي اللي يحبونك ويتابعونك بصمت


:))))

ARTFUL يقول...

هلا طباختناااا

:)

قلت الحين بتعترف وتقول ان كل الطبخات اللي شفتوها مو انا مسويتها

p;

انا بنتي شكلها عسماويه

:)

mellow يقول...

إستكانة

آنا دائماً مستعدة اتلقى "اللمات" خاصة إذا كانت من وحدة مثلج :) ، ما تفقدين غالي ياحياتي :**

لا الأكل من زمان باليمين ...إي صج من الأشياء إلي الناس ما يعرفونها عني غني ما أعرف آكل بالقفشة و ما احب آكل فيها آنا الود ودي حتى الشوربة أشربها بالشوكة...جد جد اتوهق إذا إنعزمت عند أحد و موحاطين إلا قفاش.

(2) حبييييبتي كفاية إنج تذكرتيني ألحين قاعدة اتخيل نفسي صاعدتلج الكوشة و ألمج :)

(3) عندي أكثر من حل حق هالـ"معضلة" إذا آنا بعزيمة فعادة تكون إختي معاي فبس تنقلب الموجة إلى "ترددات أثيرية سلبية" ألتفت على إختي و نقعد نسولف جنه مو شايفين بعض من زمان.
إذا كانت القعدة بمطعم فأركز بالأكل أبرك لي.
إذا بالدوام (و يااااا كثر ما تصير) عاد مني صج صج أفشل ..أشغل يوتيوب و أحط السماعات على أذوني.

(4)صج ناس وايد يطفرون منها ، بس باللحظة إلي يتلقون فيها اللمة يمكن أول شي راح يكشون بعدين يرتاحون.

(5) يختي يا حلاتهم ولهانة عليهم :**

(6)اليباب الكويتي هو حركة ترددية للسان بحيث يقوم بـ"طرق" السقف الداخلي خلف الضرسين الأماميين مباشرة ... أحتاج جثة أشرحها و أشرح عليها علشان شغلنا يكون وفق أسس علمية.

aL-NooR . يقول...

الله خوووووووش
اسرار ..حبيت اسرارج
و الا التيبب ..ودي اتعلم تصدقين
و اللمة انا من النوع اللي صعب
الم ..يعني ماس معينين و ينعدون على الاصابع ..بس تصدقين في ناس نفسيا
من اتشوفينهم تحسين ان لمتهم فيها احتواء...و انا متأكدة انج منهم :*


عسماااوية ...اللــــــــه
كان ودي اكون عسماوية ..
عموما ..العسمويين ..احتمالية يكون خطهم حلو ..و رسمهم حلو اكبر ..و نسبة الذكاء عالية :)



على الهامش
استكاااااانة
يصير المج على هالكلام
بغيت اصيح :** ترى
تسلمين ..والله انج غالية من قبل
و انتي ادرى بغلاتج صح ؟
و اللي ما تدرين فيه اني
ادعيلج من بد البلوقرز
ان عسى الله يوفقج ..و يتمم عليج

************************

mellow يقول...

واااااااي جندولة

شم و لم ...كلش مو خوش تعبير...أتخيل وحدة راعصتني و تشفطني بخنافرها ... ويع. إذا الناس يتخيلونها بهالطريقة ما ألومهم إذا كرهوا التلمم.

لا عاد مساكين عيالج لميهم بس بطريقة شادية بـ "يا سيد الحبايب يا ضنايا إنت"

و بالأخير ...سعيدة أكثر بوجودي معاكم
:))

قولولولولولولولولولووووووووووش

mellow يقول...

والله يا الزين إهي اللمة تشفي كل داء بس من عقب تشبيه جندولة شكلي بعيد النظر فيها.

سعيدة بتشابهي معاج :*****

Nikon 8 يقول...

لووووووووووووووووول
تعرفين تيبين وتحضرين دوم العروس ؟!!!
شالسالفة ؟
زغرودة حلوة لأم اليباب
:)

I7na 3shagnaha يقول...

:))))))

sij mahagait

i am amazed :))

al3amil alwa7eed al moshtarak al kah6 al 7ilo bassss


bas yatni good idea

ba3arfich 3la 3yali b spain chood yalzigoon feech o yfokoony


shrayech :)))))

Sweet Revenge يقول...

نــــورتي مدونتج ميلو وتصدقين اسرارج عجيبة تينن احب الاسرار
اول شي ما انتبهت انج عسماوية ابد ماعندي قوة ملاحظة طلع
اما العروس فالصراحه ابتلش من استلم العزيمة لان اختب واتوتر ليش ما ادري
وما يرح التوتر الا لما احضر العرس وكلللللله متاخرة لو اطلع من الظهر
اما التحلطم فانا معاج يقمت القلب
بس سالفة اللمه عجبتني علي قولة استكانه فيها حنان,عندي لج لمه ;)
اليهال احبهم بس اطفرهم وايد واحب اسولف معاهم بس اخر شي يخربون برستيجي p:
اما اليباب فكلش ماعرف بنت خالي تعرف بس ما قدرت اتعلم منها للاسف
مشكورة ميلو علي :الواجب الحلو يا ريت كل الواجبات جذي :)

mellow يقول...

جندوله
أشاركج بكل كلمة قلتيها حق عزيزتنا إستكانة :)

mellow يقول...

آرتفل

حيا الله إلي مناشبني :)

العسماويين أحلى ناس :)))

mellow يقول...

صباح "النور" :)

تصدقين يوم كتبت ما هقيت أسراري فيها زود ، بس شكلكم مستانسين عليها ...أشوه :)تصدقين أحس لما ألحين فيني شوية من طبع اليهال أستانس لما أثير إهتمام أحد و إن فيني شي غريب و ملفت.

بالنسبة لـ"اللمة" ، أول يوم كنت صغيرة من غير مبالغة كان إييني عوار ببطني من أحد يجيسني ، ما أحب ما أحب ، بس بعدين آنا غيرت نفسي و غيرت إلي معاي بالبيت :)، تبين ألمج ؟ جربيها مرة ...حَ تحبيها كل مرة :q

أحب حقيقة كوني عسماوية ، توني خالصة من دورة تزيين الكيك و لما تعاملني المدرسة معاملة خاصة لأني عسماوية أحس بالتميز :) ما قلت لكم ياهل :q

mellow يقول...

نيكون

لووووووووووووول تبيني أكشف السر الكبير و أقول إني آنا "أم فيصل" إلي إييبونها تيبب بالعروس :))))

mellow يقول...

أحنا عشقناها

أكييييييد إن شاء الله راح أتعرف على عيالج بس خوفي لا يفشلوني و ما يدانوني.. سكتي آنا وحدة معاي بالدوام بنتها أول ما دخلت الروضة كانت كل يوم تتصل بأمها تصيح ما تبي تروح تداوم إلا لما تحاجيني ألحين أشوه طخت ، بس عقبها أخوها الصغير نقر منها و صار كل يوم يتصل بأمه علشان يكلمني عاد هذا إلي عمره ما شافني !!!!

على طاري الخط ...أذكر أول ما اشتغلت كنت قاعدة أعبي إستمارة (ما أذكر أي ورقة) المهم الموظفة شافت خطي جان تقول لي أنصحج لا تكتبين بهالخط جدام أحد من الدوام ترا يكدشونج ، جان بطاقات جان لوحات جان أظرف كلها بيقطونها عليج ، تصدقين من اشتغلت تدهورت مهاراتي بالخط شويه و السبة هالشي :q

mellow يقول...

سوييييييييتيييي

هلاوييييين ...آنا المفروض أسألج قبل لا أكتب هالبوست (شنو الشي إلي ما تتوقعينه يكون فيني؟)

بس بالذمة شكلي يوحي إني أعرف أيبب ؟
و معقولة آنا لما ألحين ما لميتج ؟ ما يصير؟ قبل لا إعترف إني آنا الغلطانة تذكري مني مناك يمكن لميتج بمرة من المرات.. مو معقولة؟

"وكلللللله متاخرة لو اطلع من الظهر"

لوووووووووووووووووووووول واي نفسي آخذ موعد بالصالون الساعة 12 و نص الظهر و ماردي أروح العرس الساعة تسع ماكو فايدة ;qqq

يالله كاني بروح أطل على واجبج ;)

شـقــران يقول...

الغالية ميلوووو


مساء زهور الأقحوان
:)

ياحيالله صاحبة البلورة الزرقاء
;)


عسماوية....إمممممممم...يقولك العسماوي إذا كان لاعب كورة فشوته للكره ماتخطي المرمى ، وإن كان ملاكم فإيده ضربة فنية قاضية
:))

دربالك تطقين الورعان
p;


وأسرارك جميلة كمثلك



فيه سر آخر ولكن أظننا الأغلب يعرفه ، وهو الطبخ وخصوصا الكيك والحلويات
:))))



لكِ مني أجمل وأعذب تحايا المساء

mellow يقول...

بو راكان :)

أهلين و سهلين أسفرت و أنورت :)
وصلني خبر إن دازين لك التاج السلطاني بس كشت فيه ...متى بتلسبه إن شاء الله؟

بالنسبة للكرة أعتقد و الله أعلم إني راح أظل أشوتها لما تنحفر الأرض و الكرة بعدها مكانك راوح.

أما الورعان ...مساكين لأ ما أتخيل نفسي أطقهم بس ممكن أشوت الكرة بالغلط عليهم ;q

أما عن الطبخ فتصدق إن في ناس لما ألحين مو مستوعبين إني أدش المطبخ ؟؟
مهما أطبخ لهم ما يصدقون!!!

حياك الله يا بو راكان
(ملاحظة : نبي بوست من عشر أجزاء عن الشيخ راكان إذا تكرمت)

غير معرف يقول...

حسنى مبارك يقدم غاز مصر هدية لدعم إسرائيل و مصر تخسر حوالى 100 مليار دولار فى 20 سنة لأسرائيل !!!

التقت شبكة الإعلام العربية "محيط " مع السفير إبراهيم يسري مساعد وزير الخارجية ومدير إدارة القانون الدولى والمعاهدات الدولية الأسبق بوازرة الخارجية وكان هذا الحوار

... لعل أزمة الأنابيب الموجودة حاليا حيث يتعذر علي المواطنين الحصول علي احتياجاتهم اليومية من الغاز تثبت بالدليل القاطع لكل الناس فشل سياسة الحكومة بتصدير ثروتنا الطبيعية من الغاز لإسرائيل بأسعار فكاهية دولار وربع للطن المتري في حين أن السعر العالمي اثني عشر دولارا ونصف. وهذا معناه إننا نحرم المصريين مع صباح كل يوم من مبلغ 13 مليون دولار أمريكي يمثل فرق السعر في الوقت الذي يتزايد فيه أعداد العاطلين والفقراء وهو ما يمثل حرمانا للمواطن المصري الفقير والمحتاج من ثروة بلده من الغاز ...

باقى الحوار تحت عنوان ( جدارغزة وتصديرالغاز لإسرائيل إهدار للمصالح المصرية ) فى صفحة الحوادث بالرابط التالى
www.ouregypt.us

voyance musulmane يقول...

merci pour tes textes

نقل عفش يقول...

أشكرك على هذه التدوينة وفى انتظار المزيد

سامي جادالله | مصمم مواقع انترنت وتطبيقات الجوال يقول...

شكرا جزيلا على هذا الطرح المتميز..جزاك الله خير