لكن هناك بالمقابل نماذج سيئة من النساء (أو البنات) ، من تدور سوالفها (بل عالمها كله) في فلك:
لاكشمي و كوماي تهاوشوا أمس و تحاذفوا بالجدور...
كوماري فتِّنت على لاكشمي ...
لاكشمي فتنت على كوماري...
كوماري و لاكشمي تخادنوا و سووا إضراب ما يبون يشتغلون...
كوماري هابة تسوي الأكل ماصخ...
لاكشمي نقرت من خدامة أمي و تبينا نزيد معاشها.
أو
شفتيها أمس؟!!! سلَّمت عليها و صدت!!!.....
سمعتي فلانة يوم تقول (........) يعني إشتقصد؟ نغزة حقي؟.......
شفتي فلانة؟!!! متصلة فيني يوم عيد ميلادي المغرب تقول لي هابي بيرثداي !!!المفروض تتصل فني من الصبح......
ليش فلانة ما اعزمتني؟.....
ليش فلانة ما يت إستقبال ولادتي؟.....
ليش فلانه ما اتصلت ؟
أو
متى أتزوج؟...
أبي أتزوج...
ما يبقى عرس مارحت له ما يبقى استقبال ما ارتزيت فيه ما يبقى أحد ما عزيته ما يبقى درس ديني ما حضرته ..ليش ليلحين ما تزوجت ليش ليش ليش :"""""""(
آنا لما أقعد مع هالنوعية من البنات لسان حالي يردد أغنية هدى حسين (وين أرووووووح وين أولّي ؟ أطير بالعالي... ما يحصل لي) .
كم هو ممل هذا الهذر، و كم استغرب عندما أجد فتاة على قدر من التعليم تبذل الكثييييييييييييييييير من أجل تحديات "أذرب" مايقال عنها أنها بلا معنى (تبيني أثبت لج إن غمازة إليسا مو صجية؟ ألحييييييييييين أطلع لج باليوتيوب فيديو قديم حقها علشان تعرفيييييييييييييييييييين بلاه بلاه بلاه بلاه)
ماني عارفة وين الإثارة بهالنوعية من السوالف؟!
لشد ما يحزنني عندما أرى مد الجمال ينحسر عن القسمات اللطيفة لوجوه بعضهن ليحل محلها الخواء بسبب هذا النوع من التفكير الضحل وهذه الأحاديث التي لا تخرج منها الأطراف المتحاورة بأي نفع .
جان زين يوجهون هالطاقة إلي يبذلونها في المعاير و اللبحة و التشرّه حق هواية مفيدة.
عزيزتي...ثقفي نفسك في مجال يثير إهتمامك، أتذكر صديقتي عندما قالت :( كل يوم الله يكتب لي فيه عمر يديد لازم أتعلم منه شي يديد ، و اليوم إلي أتمم فيه تعليمي ...هو اليوم إلي أموت فيه) نعم ، فالحياة ليست سوى عملية مستمرة من التعلم .
غوصي في أعماق ذاتك و استخرجي مكنوناتها الثمينة ، فقد تجدين في نفسك طاهية ماهرة تنقل البهجة من مطبخها إلى موائد الأحبة ، أو مهندسة ديكور بالفطرة تحول عالمها و عوالم الآخرين إلى مكان أجمل للعيش ، أو ربما تجدين في داخلك حساً فكاهياً ذكياً ترسمين فيه البسمة لذوي القلوب الحزينة...أو أو أو...أياً كانت موهبتك فهي رسالتك التي خلقت من أجلها ..
إكتشفيها..
أحبـِّـيها...
نمـِّيها...
و هكذا ، "تسوِّقين" نفسك خير تسويق للآخرين فيتهافتون للإستمتاع برفقتك و مجالستك.
و الآن
ألم يحن الوقت لإزاحة الستار عن ذاتك الحقيقية؟
هناك 42 تعليقًا:
الغالية ميلوو
مساء النرجس
الحباة مدرسة كبيرة كل يوم تثيت لنا أننا مازلنا نتعلم ولن نبلغ من العلم حتى أوّله
أما (بعض) النساء وأحاديثهن،،،فزيدي عندك أن هناك رجال بدوؤا ينافسونهن في التوافه والقشور من الأمور
هناك حالة من الثقافة السطحية في المجتمع،،،رغم أن أفراد المجتمع يتمتعون بنوع من الحياة المستقرة!؟
هذه السطحية ليس ملام بها الفرد فقط...وإنما هناك مؤسسات المجتمع المدني وغيابها كما أن البارز منها تسيطر عليها عقول ضعيفة وتهتم بالتوافه من الامور!؟
تقبلي مني أجمل تحايا المساء
مساء الخير :)
هقيتج بتكتبين عن بلاد الأندلس .. :))
كالعادة.. متألقة و موفقة بانتقاء المواضيع
أعتقد بال chemistry , في كتاب من أول سطر أقلب الصفحة و أجابل الtv
و في ناس أحسهم يتكلمون بلساني و جني انا اللي أكتب :)
سوالف الحريم كنت أحبها و أموت عليها
بس صارلي فترة أتجنبها.. و أفضل السولف مع صديقاتي المقربات جداً
ساعات ما الوم الناس على سطحيتهم و تفاهتعم.. المادة و لله الحمد وفيرة و الوقت الضائع ما عندج أطول منه..ماودي أقول ان الدنيا ما حكتنا عدل عشان نكون اكثر جدية وأكثر تحمل للمسئولية
اكتشاف الذات :))
تصدقين صارلي فترة أفكر بس ليما الحين ما وصلت لشيء..
ساعات اكتشاف الذات على كبر يأثر سلباً على الحياة الأسرية.. من جذي متروية في اكتشاف ذاتي..
مابي اطول عليج :))
شنو علاقة العروس بالاستقبالات بالدروس الدينية بالزواج
buenas tardes ya Mellow
واللي تجابلك من أول القعدة لي آخرها و ما قصتها الا حلمت الحلم الفلاني...... وبالتفصيل الممل... احس تييني حالة من الفرور... ودي اكوكس على كبر الصالة!!!... الجلسة كلها تكون مخصصة لتفسير اضغاث احلام كل وحدة!!
بانتظار بوست الجنوب الاسباني و خاصة منطقة
Suhayl
:)
رائعة المقالة ..
لفترة كنت أعاني من هذا الشعور
واكتشفت أمي بعد .. ولأني نفس أمي مانحب الهذرة الي مانها فايدة
أمي صارت تختار مجالسها ..
فصارت مجالسي أفضل ,,
في علاقاتي الإجتماعية المرتبطة بالوالدة ماتقصر لله يحفظها ماتقصر بإختيار أفضل المجالس
وعلاقاتي الشخصية متخذة نفس منهجية الوالدة ,,,
فهذا يؤدي لبيئة رائعة في الحوار بشكل متكامل
Mellow..
مساج الله بالخييير ..
ابصراحة موضووعج يلمس تصرفات وايد مزعجة في مجتمعنا، والمشكلة إن محد قاعد ايغيرها ..
يعني بالنسبة لي مثلن أضطر أحضر مجالس ماتعجبني والسبب المجاملة وعشان مايزعلون :( عاد هذي حالة وأتم قاعدة ولا كلمة والسبب ما في موضوع مشترك أو يهمني ينطرح.. وأحيانن أعلق على المواضيع البايخة بس عشان محد يقول شايفة نفسها ..
ولا الهبة اليديدة .. مهند، أسمر،،، ماذكر الباجي .. عاد هذي مواضيع؟؟
بو راكان
مساء رضى الرحمن
قاعدة أكتب موضوعي و أشوف بوست لميس تحت الحصار...نساء يناضلن من أجل قضية و أخريات نظرتهن للحياة أصغر و أضيق من سم الخياط ، ما اطلب من النساء إنهم يناضلون علشان تكون لهم قيمة لكن من وجهة نظري أنه من واجب كل فرد إكتشاف ذاته و كشفها للناس فالرسول صلى الله عليه وسلم قال "إن لنفسك عليك حق" هنا تكمن قيمة الإنسان.
صدقت قد لا يكون الفرد وحده الملام ...فنحن نعيش مخططاً للفشل على جميع الأصعدة.
تحياتي لك
أحنا عشقناها
أول مراحل إكتشاف ذاتج إنج تنزلين بوست في مدونتج :) ردودج وايد حلوة ليش ما تكتبين؟
آنا عندي صديقات الثنوية وايد بس عندي صديقتين أهمه إلي أمون عليهم و كلما أقابل هالنماذج إلي موجودة بالبوست أحمد ربي لأني أحس إني محظوظة بهالصديقتين.
Andalucia إبتديت أجمع الصور إلي أبيهم و قاعدة أكتبه شوي شوي و إذا الله كاتب إن هالبوست ينزل راح ينزل إن شاء الله.
حبيبتي إخذي راحتج و طولي على قد ما الله يقدرج :)
ذكيه صديقتج مهما كبرنا نظل كل يوم نتعلم شي يديد
اما سوالف الحريم فهذي صايره ازمة فعلا ان ابتعدتي انت مغرورة ومتكبرة وان قعدتي كسبت اثام من الحش والقرض ولا حاشج صداع من الكلام الفاضي الي لا يقدم ولا ياخر
فهد العسكر يسألني إشعلاقة العروس بالعزا بالاستقبالات بالدروس الدينية بالترزز بستاربكس بالفرارة بالمقرات أيام الإنتخابات بحضور المعارض بالزواج؟؟!!!
ما أصدق!!!
أوكي إن كنت ناسي حفكرك.
كلهم فيهم ناس وايد بمكان واحد مما يتيح الفرصة للبنت أنها تبيّن:
-جمالها بالعروس
-سنعها بالعزا
-كشختها بالإستقبالات
-ثقافتها بحضور الندوات
-مواكبتها للمستجدات على الساحة الإجتماعية بالمعارض.
-ديانتها بالدروس الدينية.
-وعيارتها بستاربكس.
و بجذي "يمكن" تنخطب، و مسكينة إلي يصير محور حياتها هالموضوع لأنها وايد بتتعب.
أتمنى إني أفدتك :)
جندوله
bienvenido
لووووووووووووووووووووووووووووووووووول واي واي صاجة و تلقينها مصرَّة و مقتنعة إن مرت حماها ناضلتها علشان جذي صار لها 3 أيام تشوف عتوي أسود بأحلامها...إستغفر الله ياربي نؤمن بالسحر و العين و الرؤى بس في ناس مساكين ما يقدرون يطلعون نفسهم من هالإطار.
آآآآآآآآآآآآآآه ليت من يهدهم و يروح سهيل.
و آنا بعد ناطرة صورج ;)
حجر كريم
مرورج أروع
المفروض إن الواحد يحسن إختيار جليسه ، لكن للأسف في بعض الأحيان نكون مستعجلين في علاقاتنا و تلقينا نوطدها بأسرع ما يكون قبل ما نعطي فرصة حق نفسنا و حق غيرنا إنّا نكشف عن ذواتنا، و بالأخير نتورط بإرتباطنا بناس مالهم أي لزمة بحياتنا.
تحياتنا لج و للوالدة
يو نو هو
والله نفس حالتي...يعني في ناس تتوهقين فيهم ...اهلج مثلاً ولا الألعن لا صاروا موظفات معاج بنفس المكتب كل يوم من الصبح ليييييييييييييين الظهر نفس السالفة حتى قمت أسرح و آنا كلش مو من عوايدي إني أسرح بس شسوي لازم أجاريهم ، يعني اهمه حبوبين و يعرفون الواجب ما تبين تخسرينهم بس صج صج اتحسف لما أشوف وحدة ذكية و جامعية و أهلها ناس معروفين يعني المفروض علاقاتها الإجتماعية تكون ممتدة و سوالفها متنوعة بس للأسف تلقينها حاكرة نفسها بزاوية ضيجة ، الخدم و الياهل إلي طول الليل يصرخ و مو راضي يسكت.
سويتي!!
إنتي وينج غطيتي؟!
كل ساعة رايحة رادة على بوست نص ساعة ليييييييييين قررت و داومت بالنادي و ألحين أحس بالنشاط و السعادة و كله بفضلج :)
يعني موضوعج كان حلو و دمه خفيف و مفيد و أثر فيني ...ليش الناس ما تصير جذي سوالفهم؟
و صاجة مثل ما قلتي أزمة ، يعني الموظفات إلي معاي بالمكتب قاعدين يعيدون و زيدون على نفس السالفة لين حسيت إني أبي أرقع راسي بالمكتب قلت ماكو غير المدونة أفضفض فيها.
mellow
شكلي بروح وبرد على هالبوست
اللي ما حجوتهم الا الممثل الفلاني رزق بطفلة والممثلة العلانية تبنت طفل نوبي.... مجابلين قناة اي قوسيب و ينقلون اخبار السيليبريتيز!!!
واللي ما حجوتها الا اليهال.. اللي مصخن ويحك بلثته عشان ضروسه بتطلع واللي تتذمر من التدريس... واللي ميننها ولدها بالهياته مع ربعه ومايرد على تليفوناتها.....
اخييييييه على سهيل!
تهقين هذرة العيايز هناك على سنع.. وهم قاعدين على الدجة ياكلون حب شمسي والا تين شوكي!
جندل
واللي ما حجوتها الا اليهال.. اللي مصخن ويحك بلثته عشان ضروسه بتطلع واللي تتذمر من التدريس... واللي ميننها ولدها بالهياته مع ربعه ومايرد على تليفوناتها.....
واااااااااااااااااااااااااااااي مو معقولة تلقينه خامس ياهل ، يعني من صجج ليلحين ما تعلمتي؟
واي إستغفرالله أحس إني قاعدة احش فيهم بس هالحجوة بقلبي من زمان و من صجي آنا ما احب أحش بس إذا سكت و ما فضفضت راح انبط ...اليوم وحدة بالدوام تقولي ميلووو أسكت الله من اسكت لسانك إشفيج لا حجوة؟
أولاً آنا فصلت و سرحت و حتى لو كنت حاضرة العقل شقول؟ إذا السوالف نفسها و رايي بالموضوع قلته من قبل بس ..يعطيني العافية ما قصرت.
أما الـebuelas فساعات أحمد ربي إني ما أفهم رطنتهم ...ذيج المرة 3 يمشون جدامي ، ثلاثتهم يتكلمون بنفس الوقت و ثلاثتهم يردون على بعض و بنفس الوقت إلي يقرقون فيه ياكلون حب شمسي ...عندهم قدرة عجيبة يحطون خمطة حب بحلوجهم و يطشرونها مثل المدفع ما شاء الله و آنا يبيلي 11 مرحلة على ما أطلع الحبة من القشر!!
looooooooooooooooooool
they call it pipas
الحب الشمسي
وال "ابويلاز" على قولتج... ما شفت ولا راح اشوف ناس تحب الهذرة كثرهم
وترا اردا منا... يقطعون اهل الواحد وينتفونه بالحشششششش
صباح الخير بعد قلبي
اول شي مت من الضحك على تعليق جندل
تبي تكوكس على الأحلام
ولك اللي ذكرتيهم نماذج مليقه وموجودة
بس يهونون على اللي تقعد وياج
وما عندها سالفه الا احنا سافرنا
واحنا شرينا
واحنا عندنا
واحنا ترى اصيلين
وانا ترى حلوة
وبيتنا اللي بالمريخ
وشاليهنا اللي بالزهرة
وييييييييع كل الناس هيلق
هلاااااكه ما اقدر
:@
هذي شتسوين فيها
انا شكلي بسوي نفس جندل وبكوكس
يخرب بيتهم ما تستفيدين من سالفه وحده من سوالفهم
وصباح التحلطم
:**
جندل
buenos dias
مو بس الإبويلاس ،الأسبان كلهم محد يقرق كثرهم ولا أحد أعلى من صوتهم و صوتهم فيه نبرة تقظ طبلة الإذن ولا لاتيمعوا عند الـheladeria ،الشياب و العيايز و عيالهم و أحفادهم و عيال أحفادهم و تكرمين جلابهم كلهم بطاولة وحدة و كلهم يقرقون على نفس السَّنّة من المغرب لين الساعة 1 بالليل و تعالي شوفي قشور البيباس تحتهم ، دفنه.
يا حلو الأسبان و يا حلو سوالفهم.
لوووووووووووووووووووووووووول الزين إيه و الله صباح التحلطم شكلي صرت أردى منهم بس هذيله إلي عندج على الأقل تستفيدين من الأماكن إلي راحوا لها و من علم الأنساب (على الأقل) بس إلي كل يوم تسولف عن الياهل إلي كل يوم يفحط طول الليل و لا تقدر تسكته ، لا من زين السالفة ولا طلعنا منها بزبدة "على فكرة حاليا قاعدة أكتب التعليق و قاعدة أسمع نفس السوالف إلي قاعدة أكتبها و كاتبتها بالبوست "
المشكلة إن عندنا ركود بالشغل و آنا ملزومة إني أسمع هالسوالف
Mellow..
يبيلهم دورة في فن إختيار المواضيع :)
تقديم الأستاذة جندل والأستاذة Mellow
أهم شي التأكيد على عدم إعادة المواضيع وخاصة المشتركة..
يعني لا للسوالف التالية:
خادمة سوت، خادمة تهاوشت ولا انحاشت.
ولدي مصخن،بيطلع له إضروس، انفلونزا
ريلي قال، فعلته وتركته.
عرس ، إستقبال.
مهند، نور ، لميس.
أأأف ف ..
بس ملينا ,,
لاعت جبدنا..
نبي سوالف وناسة وفرفشة مانبي هم وكدر ..
هو احنا نائصيين ؛)
نبي سوالف مفيدة وحلوة..
نبي نسمع المديح لاشافو شي حلو مو بس نسمع الذم والحش إذا ما عجبهم :(
و Sorry على لطوالة :)
شنقول بعد ، حريم
عادي شي طبيعي!!! p;
لا لا مهو الكل بس الغالب
وايد منكم هذي اهتماماتهم!!!
وترا هم عندنا احنا الشباب !! اللي يشيب الراس
بدت الاهتمامات التافه تزيد عند الشباب
اللوك وقصت شعرك ومادري شنهو!!!
احاديث الثقافة والمواضيع الادبية بدت تختفي من حديث الدواوين ، يا مشاحنات سياسة او كلام ماله معنى!!!
ومن الشغلات اللي تدل على الاهتمامات الي مالها داعي
شوف المحلات اللي حواليك راح تكتشف انها تبيع شغلات تافه وغاليه جدا
بس عليها اقبال كبير
على التاجر الف عافية لذكائه وشطارته وقدر يقنع الناس بمدى جودة المنتج وان سعره فيه وانه صج يستهال اقط عليه هالكثر
وما يعتبر هذا غش على قولة سعد الفرج!!!
تحياتي لج
هههههههه يا حلو سوالفج يا ميلووو ضحكتيني علي سالفة شعلاقة العروس بالدروس بستاربكس انا علي بالي بس علشان الناس يشوفونهم اثرا كل مجلس له غرض
يعطينا ماعطاهم من هاالفطانه لا اله الا الله
بس تصدقين مرات يكسرون خاطري هالنماين من الفراغ ولا لو كل وحدة عندها هواية او وسيلة تشغل نفسها فيها ماكان هذا حالهم
يالله عطيتيني موضوع بوست اكتبة ان شاء الله في المستقبل
شفتي سوالفج حلوةشلون تيب افكار بوستات
:)
وصج استانست لما قلتي انج مشيتي ,حلو المشي
دنـيا عجيبة يختـي !
الله يستر علينا وعليهم , والله من يمسكون الوحـدة يآكلونها أكـال .. عسااج ما تطيحين بلسانهم !
خـواء فكري عافانا الله ما عندهم إلا يتحجون بفلانـة وعـلانة وهـات يا إشاعـات وخـرابيط !!
الحبيب صلى الله عليه وسلم قال " يا معشر النساء تصدقن فإنكن أكثر أهل النار " ..الحـديث.
اللهم أجرنـا من النـار !
وذكر السبب : تكثرن اللعن وتكفرن العشير !
فعلاً .. فـي ناس لسانهم ما يمسكونه سب مـو طبيعـي أما من باب الميانة أو إن تكون مسويتلها لـو شي بسيط وتكبره وتسبها جـدام الأكو والمـاكو !!
طبعاً مو الكل البعـض والله يهدي الجميع :)
الله يرزقنا وإياهم إستغلال الأوقات فـي الخير وبالكلام الطيب ..
وشكـراً على الاسـلوب الشيـق .. ترى الموضوع على الجررررح ;q;q;q
السلام عليكم
الحريم و السوالف علاقة ازلية
بس و الله قوية هالسوالف
حتى احنا الرياييل عندنا اللي يسولف و يجذب الناس حوالينا و عندنا السوالف التافهة اللي ما منها فايدة
لو كان واحد فينا حط اب باله هالآية " لا تقف ما ليس لك به علم ان السمع و البصر و الفؤاد كل اولئك كان عنه مسؤولا" جان عم الصمت الا من المفيد لكن بالنهاية الانسان خلق عجولا كثير النسيان
============================
غوصي في أعماق ذاتك و استخرجي مكنوناتها الثمينة ، فقد تجدين في نفسك طاهية ماهرة تنقل البهجة من مطبخها إلى موائد الأحبة ، أو مهندسة ديكور بالفطرة تحول عالمها و عوالم الآخرين إلى مكان أجمل للعيش ، أو ربما تجدين في داخلك حساً فكاهياً ذكياً ترسمين فيه البسمة لذوي القلوب الحزينة...أو أو أو...أياً كانت موهبتك فهي رسالتك التي خلقت من أجلها ..
ارشحها للقب أحلى فقرات البوست !
كتاباتج استطعت ان اقرأ بين سطورها نظرة واعية لهذه الحياة
يعطيج العافية و لا تحرمينا من قصصهم !
يو نو هو
واي أستحي ... أخجلتيني آنا أستاذة سوالف ، حبيبتي ما تقصرين :* إلا بسئلج ...ليلحين في ناس يسولفون عن مهند و لميس و يحيى ؟ واي دثارة ،أو بالأحرى أزمة أتخيل نفسي وآنا في مجلس يتهاوشون الحريم فيه على (منو أحلى مهند ولا يحيى؟)
سويتي
حلت دنياج حياتي ... وصاجة مساكين هالبنات ، شوفي لا أزكي نفسي ، آنا كنت في فترة من الفترات وايد أحاتي موضوع الزواج بعدين قلت في نفسي إذا الله كاتب إني بتزوج بعد عشر سنين أو اكثر هل بقعد احاتي من ألحين لين بتزوج؟ إداد له هالقلب ... و بس ، الحين آنا شاغلة نفسي باشياء وايد و ما صار الزواج بحد ذاته هو الغاية،الزواج صرت أنظر له الوسيلة إلي تربطني برجل ىنا وياه متكافئين في الكثير من الصفات و متكاملين في الكثير من الصفات و إذا ما ظهر هالريال ألحين ما عندي مشكله إني انطر ، اما سالفة إني اتزوج بس علشان اتزوج هذي اعتبرها مغامرة أو "مقامرة"
آرتفل
واي ، ريال و ما سالفته غير اللوك و قصة الشعر؟! البنات يالله نبلعهم هالدور ريال ، ما يطوف.
يا خوي ما نبيهم يتكلمون لا عن أدب ولا تاريخ ولا سياسة لأني بصراحة قاعدة اشوف أزمة إن غالبية الناس ألحين يتكلمون عن كل شي حتى لو أهمه مو فاهمين فيه ، ما عندي مانع إني اقعد أسمع واحد يسولف عن الحداق أو القنص او وات إيفر سبحان الله الناس إلي فاهمين شنو قاعدين يقولون فجاة تلقى نفسك تندمج معاهم حتى لو الموضوع مو من إهتمامك...أما إلي ما أستحمله الحنه و اللبحة و المعاير (آه يالمعاير) في توافه الامور ن اتعجب من البنات إلي عندهم نفس طويل حق هالاشياء ما شاء الله عفية قلب.
حياك الله
بوح الصمت
يا هلا فيج ... ماني عارفة شلون الناس يستسهلون الحش ، يعني آنا ظليت مدة اعاني من هالنوعية من البنات (إلي كاتبه عنهم بالبوست) و ودي اشكي حق أمي حق إختى حق صديقاتي بس ادري إنهم يعرفونهم فيطلع شكلي جني قاعدة احش فيهم، لين حسيت إن طفح الكيل و إن الموضوع يحتاج للمناقشة فقلت أفضفض بالمدونة(محد بيعرفهم إن شاء الله) خاصة إن السالفة تحولت من مجرد الإزعاج إلى معضلة ، هالنوعية من البنات ما عندهم مشكلة إنهم يوقفون عند الامور التافهة ويكبرونها و تلقينها تسوي أزمة من شي ما يسوى و تزعل مادري جم يوم، يعني لو هذي عندها شي تشغل نفسها فيه جان تغاضت.
اما إلي يسبون من باب الميانة فهذي أعتبرها خلل في طريقة التربية ، الميانة تقتضي الإحترام.
آسفة طولت عليج :)
مشكورة حبيبتي حياج الله :)
أخوي أحمد نبيل
ودنا شركات الاتصالات يعرضون لنا فواتير المشتركين من الجنسين و نشوف منو يقرق أكثر :) بس ما على قرقة الحريم (يا حلونا)
أسعدني اختيارك لهذه الفقرة و للأمانة هذا الكلام تعلمته من أحد كتب د. باربرا دي آنجليس و آنا جداً معجبة بكتاباتها لكن للأسف ما أذكر الكتاب إلي قالت فيه هالكلام يا real moments أو secrets about life every woman should know
و أشكرك جداً على الإطراء
تحياتي لك
تدرين شنو حسيت؟
بخاطري اصفق
صفقه صفقه
:))
انا ويني عن هالبوست الحلو من بدايته؟
!!
هناك توارد خواطر غريب فيما بيننا
كنت اريد كتابة عن تلك المجالس التي تقومين فيها وانتي مرهقه
وكأنك ركضتي لاكبر مسافه ممكنه
تنهتين
ومتعبه
من حمل الكلام والحش والنقاشات المسمومه باحساس الغضب والسخط على الدنيا كلها
!!
بعكس بعض المجالس والصديقات اللاتي يكون الحوار معهن باعث للنور والفرح والاحساس بالتفاؤل من كل شئ
الدنيا اكبر من مشاكل خدم
واجمل من هم زواج بيد الرحمن
وارقى من هموم نبعثرها على قالت فلانة وقالت علانة
شنو اقول بعد؟
بردتي قلبي عسى ربي يبرد قلبج دنيا وآخره
:)
إستكانة
عساج تتنعمين إب براد الجنة قولي آمين
ضبطيني بالخواطر
آنا أورد لج و إنتي ورديني :)
إلي يضيق الخلق إن هالبنات إلي كتبت عنهم أحبهم ، و يمكن من حر ما فيني عليهم كتبت إلي كتبته.
يعني لما تشوفين وحدة تنتفض من الحرة و السبة الخدم
ولا وحدة ما إهيه متنرفزة من فلانة وعلانة و إشسوت و إشقالت و فعلتها و تركتها.
ولاّ ذيج إلي سدحوها بالمستشفى و بعدين يا ها القولون و الصداع النصفي و غير النصفي من كثر ما تفوكر بالزواج وليش فلانة تزوجت و آنا لأ..يا ربي بعد هذا رزق ، يعني لو متقدم لج هالريال إلي خطب فلانة جان وافقتي عليه ؟
آنا متأكدة مليون بالمية إنها بتقول لأ بس إهيه بتتزوج علشان تتزوج.
البوست ما فيه أي مبالغات حتى ذيج (إلي زعلانة ليش رفيجتها اتصلت فيها المغرب ما اتصلت فيها الصبح) صج مو تأليف من عندي.
يعني الواحد ناقص هم علشان يدور عليه؟ بس الفراغ و ما يسوي.
شاكرتلج مرورج :*
بوست اكثر اكثر من رائع
تحياتي لج:)
وااي ميلو موتيني من الضحك على هالاشكال .........
تبين التحلطم والتقرطم على اصووووله تعالي داومي معاي يوم اتشكي ماااله واالي وتدرين طبيعة شغلي تحتم علي اني اكون مستمعه جيده واحلل كل كلمة تنقال اخلص من المراجعيين واقرر اني اخذ بريك عشان اصفي ذهني بطريج الاستراحه ايوونج الاداريين وتبتدي الحنه احاول اتفجج منهم عند باب الاستراحه تسمعيين حس السيينيور هااااا ماخذة بريييييييك؟ .... اي والله هذي قعدتي من صباح الله خير افترت خرييطة راسي .... في احد ماسك مكانج! ... اكيييد ولاجان ما هديته واللي يحر جان زين هاللي يتحجى مسئولي!!! اوكي اخيييرا وصلنا الاستراااحه واذا بأحدى زميلاتي في العمل تدخل وااااااااي اخييييييرا لقييت احد احااجيييييه سمعتي فلان شنو قاااااااال؟؟؟؟ واذا طالعنا عن هالاطار تبتدي الاسطوانه المشرووخه ولدي زوجي خدامتي!
اكتفي بهذا القدر لأني انا اللي بديت اتحلطم !
خوختج الحلوه :)
Mellow..
ماأدري شي إضحك ولا يبجي ..
أروح يمعات مايتكلمون إلا عن مهند، أسمر وعلي.. كل وحدة اتعاير الثانية..
إللي يقول دارين عن هوا دارهم..ولا ناطرينهم عند الباب ..
وإللا أم العياال.. إللي متابعة ستار أكاديمي.. وياليت الـ برايم.. لا امتابعتهم وهم ياكلون ..وهم نايمين
حسافة على وقتي..
حسافة علي وانا قاعدة وياهم :(
why me?
مشكورة حياتي مرورج أروع
خوخة
إنتي الله ياجرج ..أشوه أن أبوي وقف بويهي و ما خلاني أدرس طب ولا هذي شغلة الواحد يشتغلها؟ مهنتي أسمع الناس يتحلطمون و يتشكون! لا وجان زين من صجهم عيارة نصهم يبون مرضيات...ولاّ حتى الطبيبات زوجي و حماتي و خدامتي؟! هوْ إشصاير؟!!
يو نو هو
ماأدري شي إضحك ولا يبجي ..
(إيه والله)
أروح يمعات مايتكلمون إلا عن مهند، أسمر وعلي.. كل وحدة اتعاير الثانية..
(ما كو بعد أسخف من هالموضوع يتعايرون فيه؟ ...بيني و بينج الغلبة لمهند :q بس علي إشيطلع؟ )
إللي يقول دارين عن هوا دارهم..ولا ناطرينهم عند الباب ..
(لووووووول جان زين)
وإللا أم العياال.. إللي متابعة ستار أكاديمي.. وياليت الـ برايم.. لا امتابعتهم وهم ياكلون ..وهم نايمين
(هذي يسمونها أمومة بلا حدود)
حسافة على وقتي..
(هذا إلي يحر)
حسافة علي وانا قاعدة وياهم :(
(إيه والله حسافة علينا)
العزيزه ميلو
والله صدقتى00مير انا شاريه مخى 00وبطلت اروح00 يا ليت تفاهه00الا حش وتقطع بجنب الاوادم00انتو شكو000 حسيت انى اخذ ذنوب بسوالف مالى شغل فيها00والا التلفونات00دق عليج ما تقدر انتى تعبانه ولا مشغوله00ولا مالج خلق00وقرقه ما تهمج 00اول اجامل00 صرت لا اشكره انا مشغوله ادق لج بعدين وهذا طريج الضيف00
لا والمسجات فلانه انخطبت لا حتى الطلاق ومصايب الناس صارت تدور مسجات
يا ميلو ناس فاضيه ويتبلغون ابمصايب الناس اعوذ بالله0
انا من بدايت 2008سويت ري فايلينق
وايد ارتحت00حتى وقتى صار فىه ابركه
أظن أن الوقت لا يحين - في نظرها - أبدا !!
المقوع الشرقي
:)
خن نعترف محد فينا ما يحش (استغفرالله العظيم من كل ذنب عظيم) بس في ناس "مهنتهم" ينهشون بالعالم سوالفها كلها حش بحش تحسينها تعيش على أخبار الأوادم وهذي من زود الفراغة تشوفينها جذي ...آنا دايماً اقول (الفاضي يعمل قاضي) على قولة المصاروة، يعني هذيله إي يبدون بـ(ليش فلانة تطلقت؟) و يخلصون منها و يمسكون فلانة و لبسها وبعدين فلانة وطريقة كلامها و فلانة الي مسيكينة زوجها عيونه زايغة (جنه ألحين من صجهم كاسرة خاطرهم ...إلا حق الشماته استغفرالله)لو كل وحدة فيهم شاغلة وقتها و همها بنفسها جان ما شفتيها اصلاً إنتبهت حق هالأشياء.
إعلامينا
عيل الله يعينها على نفسها و الله يعينا عليها
شاكرة لك مرورك
إرسال تعليق