حرصاً على الأمانة العلمية و نزاهة النقل و الإقتباس :))
أقر و اعترف أنني إستوحيت طريقة كتابة بوست (إسبانيا قصة عشق) بجزئيه الاول و الثاني من الاغنية الهندية إيسا ديسي هي ميرا (هذه أرضي) من فيلم .فير زارا
دورت على ترجمة الاغنية بالعربي ما لقيت بس حصلت الترجمة بالإنجليزي.
أترككم مع الاغنية و أترك المجال لـ (فير براتاب سينغ) البنجابي ليعرِّف (زارا حياة خان الباكستانية) و يعرِّفنا على قريته :))
وايد احب هالأغنية
لو سون لو ...قدم قدم بي هي مل جاني ..كوي بريم كاهاني :))
خيوط الوله
قبل 4 أشهر
هناك 25 تعليقًا:
كيساهي ... اجاهي
انا حدي مع الافلام الهندية " تم كاري سديكي"
ما فهمت شيء
بس خوش غنية :))
عاد انا قايلة يبيلي دورة اوردو ليش ان عملائي كلهم هنود :))
loooooooooooooooool
مو راضي يعرض عندي اليوتيوب
بشوفه عقب
ويا صباح شاي لهنود اللي ما عندج احلى منه
@@ من يومين بس طرا علي ابي اشوف فلم
فيرزارا كثرما سمعت عنه ماشفته
وكنت بطلبه من زمااااان عن الافلام الهندية
وي وي
اغط يومين ايي القى البوست مقلوب هندي والعنوان هيروغلفي ما فهمت
!!
بس ارجع البيت بشغله واشوف
وارجع البوست الي طاف
ماحب يطوفني منج شي
:))
صباحج ورد
صباح الخير أحنا عشقناها
إسمها تم بيار سي ديكو ..لا تسإليني شنو معناها.
بس ما يصير جذي خبرج عتيج بالأفلام الهندية ترى و نيسة.
إهيا بالفعل خوش أغنية :))
فير ما كان يشرح حق زارا بس الاماكن ، بل شمل شرحه أشخاص منسيين أسمائهم نكرة و أبرز مشاعر لم يتم الإلتفات لها ..هذا إلي حبيته بالأغنية.
ماله داعي دورات أوردو بمادري جم و دوام بعد الدوام الرسمي..جابلي أفلام هندية أونس لج.
جندولة
لوووول جنج تدرين إني توني خالصة من جاي حليب مال الهنود؟
بس قللت السكر آخر مرة سويته شيرة يمحر
و إن "عقب" لناظره لقريب :)
ويييييييي يا حلاتج سويتي طلعتي من ربع الأفلام الهندية :))
فير زارا وايد حلو سووه في فترة كانت أشبه بشهر العسل المؤقت بين الهند و باكستان ، فصناع السينما في بوليوود إستغلوا هذي الظروف في إنتاج أفلام تعزز من هذا التوجه السلمي و تحاول القضاء على أي مشاعر سلبية.
القصة وايد حلوة و وايد رومانسية و أبشرج .. زهبي قواطي الكلينكس يمج.
إستكانة
لوووووووووووووووول إنتي بعد غطي لج يومين زيادة تلقين المدونة مكتوبة بالحبر السري.
يالله ناطرينج تردين البيت :))
صباحج phool aur gulab
يعني صباحج ورد و جوري :)
الاغنية تينن يا ميلو
ماشاء الله كلك ذوق
آه على شايهم وحليبهم يا ميلو
يبيله بوست.... تصدقين!!! على اني احب الحليبة مالتنا ام هيل... بس ما اييب راسي غير حليب شاي لهنود!!!
:)))
انا مو زود عل أفلام الهندية... بس وايد عجبتني الاغنية والبلد وقصب السكر اللي ياكلونه ذكرني ببيت عمي في تورونويفا
:)))
كنا نتمشى بهالمنطقة وعصي قصب السكر باييدنا نخاف من جلابهم عزج الله
:)))
كنا نقرم ونهش فيها بنفس الوقت
اهديك هالاغنية
:)
http://www.youtube.com/watch?v=hnWMkPswaAs
دوود
يعني جاي حليب بالهندي
( بديت اتعلم اوردو )
جندوله ياحياتي مشكوووورة على النقصة :*** ما شاء الله عليج يبتيها ييب مع الأغنية الهندية.
ذكرتيني بأغنية ثانية حقها بنفس الألبوم كنت وايد أحبها إسمها tus ojos
*****
أغنية ديسي هيه ميرا من أسمعها تخنقني العبرة ولا صوت الشايب إلي بأول الأغنية أحس حبه لبلده معتتتتتتق.
يعني القرية بسيطة و الناس جداً فقراء حتى طبيعتها تعتبر عادية مقارنة بالأماكن الثانية إلي يصورون فيها الأفلام الهندية (مثل كاندالا و تشامبا) بس التعابير الغنية لكلمات الأغنية (رغم بساطة مفرداتها) أعطت القرية الفقيرة أبعاد ثرية.
********
أسبانيا فيها قصب سكر؟!!
آنا تدرين حتى تورينويفا مو مثبته وين هي!
توريمولينوس محد ما يعرفها .. توريبلانكا لزيجتنا .. توريمويّه و تورينويفا إلي مو مثبتتهم...بروح أدور بغوغل.
أحنا عشقناها
لووووووول
هدا هدا شره غدا ..كا بدينا إنتعلم ;)
تورونويفا تبعد عن فوينخرولا 5 دقائق بالسيارة... بطريق ماربيلا
يم لا كالا ويمها فيريا
:)))) ويا زينها من بلد
والاغنية وايد حلوة قاعدة اعيد وازيد فيها
وشكلي بروح الهند عقب السرايات انشاءالله!!!
ميتة ابي اشوف هالبلد...
جندولة
بسسس يوم قلتي فيريا عرفت :)))
الحمدلله على السلامة
الهند ودي أشوفها بس آنا قايلتلج من قبل، دول شرق آسيا أحب أطالعهم بالتلفزيون بس ما أجازف أروح هناك..و السرايات إلي بتنحاشين منهم بتلاقينهم هناك ..وحدة نعرفها تقول أول كنت أشوف الأفلام الهندية و أتطنز على المشاهد إلي فيها مطر يعني إبين مو صجي..تقول يوم رحت كيرلا قلت خلاص أتوب أتوب ماني متطنزة خلاص صدقت...مايندري بأي شهر رايحتلها؟
ميلو
مافي احلى من الكلمات البسيطة والصادقة بنفس الوقت
انا حبيت اغنيتك لاني لمست صدق كلماتها
اما اغنية غلوريا استفان فهذي شي ثاني
:)))
la tierra te duele... la tierra te da
en medio del alma... cuando tu no estats
la tierra te empuja... de raiz y cal
la tierra suspira... si no te ve mas
حبيت كوبا من هالاغنية... تحسينها صج تحب بلدها وتحن لها
:)))
والله الصور اللي حاطتهم حلوة حتى لو بدون اغنية خوش موضوع :)
أوووب أوووب المود قالب هـندي !
;q
ما أسمع أغانـي :)
ننـطر بوست آخر يوافق رغباتي ;q;q;q
الله يحفظج وييسر لج الخير وين ما كان :*
أول شي قبل لا أبتدي أرد على التعليقات أبي أعتذر لأني وايد تأخرت بالرد
يوم الثلاثا إلي طاف كنت رايحة الدوام و آنا مواصلة مو نايمة فكنت طول اليوم هلكانة..أمس الصبح في المكتب يوم ييت أجيك على المدونة ولا كمبيوتري فيه فايروس و قعدت طول اليوم لا شغلة ولا مشغلة ورديت البيت تعبانة من الملل.
أدري قصيت قصة حياتي بس عذروني.
حبيبتي جندولة
صبحج الله بالخير ...ولهت عليج :**
مشكورة على كلمات الأغنية ، بس عموماً الأسباني ترى آنا وايد ضعيفة فيه و لازم يمي ديكشنَري ، بس وايد حلوة كلماتها و تتناسب مع الأغنية موضوع البوست.
و آنا شكلي بقوي لغتي الأسبانية من ترجمة كلمات الاغاني :)))
إعلامينا
مشكور أخوي و الشكر كذلك موصول لصاحبة الكاميرا :) صورها أساس الموضوع.
الأغنية آنا حاطتها لأني بالفعل يوم حبيت أنزل بوست عن أسبانيا ، حبيت إني أتكلم عنها بنفس الطريقة إلي شرح فيها فير حق زارا قريته..و بنفس الوقت كنت حابه إنكم تشاركوني شي أحبه إلي أهو الأفلام و الأغاني الهندية :)))
بوحة الرقيقة :*
مشكورة حياتي أقدر لج مرورج و التعليق على الموضوع على الرغم من إنه لا يتفق مع ذوقج و مبدئج.
لا تحرمينا من هذي الزيارات :**
إحم وجااان يمدحووووني ويقولون إني رقيقة جان أصدق عمري ;q
يزاج الله خير .. أنا هني دووم أفا عليج معكسرة ;q;q
ودي :* ..
بوحة الرقيقة
جااااااااااااان تصدقين عمرج!!! ليش ما تصدقين ؟ لأ صدقي
حبي:))
ميلو
رايحة ورادة على اغنيتك
:))
جندوله
لوووووووووووووول لا بالله إستاثمنا فيييييييييييج :))
عيل شوفي الفيلم :)
بس الافلام الهندية يبيلها مهارة علشان تشوفينها. اول شي لازم تشيلين مخج من راسج و تخلينه على كتر متى ما خلص الفيلم تردينه، في الأفلام الهندية لازم تخلين الأحداث تجرفج توديج يمين يسار فوق تحت ، لا شفتي فيلم هندي لا تسئلين ليش و متى و إشحقه و إشدعوه..من غير ليه هو جذي ، فيلم هندي...بس مو معناته إن فيلم فير زارا مو حلو ، أهو وايد حلو بس الأفلام الهندية لا تخلو من السقطات.
و طبعاً لازم تراعين الآتي:
لا للكحل ..لا للمسكارا..علبة كلينيكس يمج + بندولتين
و كل فيلم هندي و إنتي بخير :**
إرسال تعليق